INAUGURAL SPEECH

ko'y nagpapasalamat sa bumubuo ng bansang Pilipinas at ako'y binigyan ng ganitong karangalan.

Sa mahigit dalawang daang pelikulang aking nagampanan, ito ang pinaka mahalagang papel sa aking buhay. Ang aking karanasan bilang isang artista at isang producer ang siyang magaahon sa kahirapan ng ating mga mamamayan.

Kayong mga naghihirap at nangangailangan ng trabahong marangal, gagawin ko kayong mga extra. Bilang isang producer, napakaraming Pilipino ang nabigyan ko ng trabaho dahil sa pag eextra sa aking mga pelikula. Matanda man o bata, babae o lalake, may papel kayong pwedeng gampanan. Ang iba'y maglalakad sa likod, yung iba nama'y mababaril kunyari. Ngunit di ko mapapangako na lahat kayo'y may speaking part.

Sa mga timigil ng pag aaral, nakuha ko na ang pangako ng ABS-CBN na magbigay ng libreng pag aaral sa Star Circle. Dito, matututo kayong umiyak, tumawa, magdrama, mag comedy, umawit. Ito'y makakatulong sa inyo upang matupad ang inyong mga pangarap na maging konsehal o kongresista ng inyong mga distrito.

At huwag kayong mawalan ng lakas ng loob kapag di kayo nakapag aral. Hindi importante ang may tinapos. Hindi din importante na makapagtapos kayo ng high school. Ang kailangan lang ay ang sinseridad.

At ang sinseridad na ito ang nagbigay sa akin ng kompiyansa upang suriing mabuti at piliin ang aking mga kasapi sa kabinete.

Si Edong Angara ang aking Executive Secretary. Napaka importante ng papel ng isang Executive Secretary kaya ito tinaguriang little President. Bilang Executive Secretary, pwede niyang palitan ang mga desisyon ng mga ibang kalihim kung sa tingin niya'y ito ay mali. Maari niyang iatras or isulong ang mga appointments ng iba't ibang empleyado ng gobyerno. Maari din niyang itulak or ipitin ang mga papeles na kailangan kong pirmihan. Pwede din siyang pumirma sa mga kontrata. Buo ang tiwala ko kay Edong.

Si Tito Sotto ang ating magiging DILG Secretary. Siya ang mamumuno sa lahat ng mga alkalde at pulis sa buong bansa. Ang una niyang prioridad ay sugpuin ang drug menace na umiiral sa ating mga kabataan ngayon.

Isang drug intervention program nag pina ngalanang Laban o Bawi ay ipatutupad ni Sec. Sotto. Sa ilalim ng programang ito, ang mga pushers ay lalabanan at babawiin natin sa kanila mga kabataan. Sa ilalim ng   programang ito, ang sinumang mag soli ng sampung gramo ng shabu ay bibigyan ng entrance ticket upang manood ng Eat Bulaga at magkaroon ng pagkakataong manalo ng isang milyon piso.

Ipinangako din ni Tito na isosoli na niya ang kandila sa kanyang mga kumpareng drug lords. Buo ang tiwala ko kay Tito.

Si Francis Escudero ang mamahala sa agrikultura. Anak siya ni Sonny, na dating Kalihim ng Agrikultura. Like father like son. Buo ang tiwala ko kay Francis.

Alam ninyo mga kaibigan, ako'y pinagtawan ng mga mayayaman nang ipinakilala ko si Sonny bilang expertise in agriculture. Alam ko na ngayon na mali yon. Hindi lang pala siya expertise in agriculture, expertise din siya sa education. Tignan natin kung sino ang tumatawa ngayon.

Sa Kagawaran ng Turismo, si Armida Siguion-Reyna ang ating ilalagay. Sa kanyang dating TV show na Aawitan Kita, madalas silang mag shooting sa mga ibat ibang tourist spots sa Pilipinas, lalo na sa Intramuros. Ang   karanasang ito ay sapat para siya'y maging Kalihim. Buo ang tiwala ko kay Armida.

Si Danding Conjuanco ang nararapat sa Agrarian Reform. Siya ay may mga malalaking lupain at siya ang tanging nakakaalam kung paano pagkakitaan ng maliliit na magsasaka ang mga lupa ng ibang hacendero. Buo ang tiwala ko kay Danding.

Kung baga sa pelikula, ito'y isang sneak preview ika nga ng aking administrasyon. Ito binubuo ng mga taong may natatanging katangian upang mapaglingkuran ang sambayanang manonood.

Ako'y muling nagpapasalamat sa lahat ng bumubuo ng cast at crew ng kampanya. Kay Direk Edong at sa executive producer na si Danding. Sa aking spokeman na si Francis. Sa PR na pinamumunuan ni Tito at ni Armida. Ang timpalak na ito'y sa ating lahat.

At sa lahat sa mga mamamayang nag tiwala at bumoto sa akin, ipinapangako ko na ibubuhos ko lahat ng galing ko sa pag arte bilang ika-labing limang Pangulo ng Pilipinas.

Mabuhay kayong lahat.
FERNANDO POE JR.

Ang sumusunod na liham ay aming nilalathala sa kahilingan ng Alyansa ng Pitong Gatang (APoG) bilang sagot sa "Open Letter" na aming inilathala noong nakaraang linggo

Ginoong Patnugot:

Napansin namin na inilathala ninyo kamakailan ang isang sulat na naghihikayat sa ating mga kababayan na sulatan si Fernando Poe Jr. upang huwag nang tumakbo bilang pangulo ng Pilipinas. Hindi namin alam kung saan ninyo nakuha ang impresyon na di magiging mabuting pangulo si Fernando Poe Jr. Kami po, ang kanyang mga kaibigan ay lubos na nasaktan sapagkat hindi man lang binigyan ng pahayagang ito ng sapat na pagkakataon na ipagtanggol ni FPJ ang kanyang sarili. Hindi po ito mabuting halimbawa ng mabuting pamamahayag.

Salungat sa mga balita na inyong kinakalat na walang alam si Fernando Poe Jr. sa pagpapatakbo ng bansa, si FPJ ay mayroong napakalawak na karanasan tungkol sa mga isyu na kasalukuyang pinagdaraanan ng ating bansa.

Ang sumusunod ay ilan lamang sa mga patunay sa pagiging malapit ni FPJ sa mga isyung pambansa.

Hustisya. Kapag Puno na ang Salop Nakikipaglaban si FPJ sa mga suhulang Huwes. Pag naging pangulo si FPJ, maraming mamamatay na huwes.

Kahirapan. Ang Anino ni Asedillo Katulad ng kanyang matalik na kaibagan na si Presidente Erap, malapit si Fernando Poe Jr. sa mahihirap. Sa pelikulang ito, si FPJ ay isang modern-day Robin Hood. Kumukuha siya sa mayayaman tapos binibigay sa mahirap. Yan ang aming idol. Ngayon pa lang ay magingat na si Danding at ang mga Ayala!

Kidnapping at Drugs. Batas ng Lansangan Sa Batas ng Lansangan, sinalo ni FPJ ang pananagutan para labanan ang kidnapping at drugs. Kapag pangulo na si Fernando Poe Jr., lilinisin nya sa ating mga lansangan ang mga kidnapper at drug-pusher. Ano ba ang laban ng mga masasamang loob sa mga ma-armalite na mga suntok ni Haring FPJ?

Manggagawa. Lagot ka sa Tatay ko Isang masipag na manggagawa si Fernando Poe Jr. Naranasan na nya ang maging isang mekaniko habang nagpapalaki ng kanyang anak na si Judy Anne. Ang kanyang hirap at pagtatiyaga ay kapansin pansin sa malimit na pagpapawis ng kanyang kili-kili sa pelikulang ito. Ipinahihiwatig lamang nito na pagpapawisan nya ng lubos ang kanyang pagtatrabaho sa ating mga Pilipino.

Illegal Gambling. Dito sa Pitong Gatang Bilang barangay chairman tinugsa ni Fernando Poe Jr. ang illegal gambling sa kanilang barangay. Sinong nagsabi na walang political experience si FPJ? Marahil, kapag naging pangulo si Fernando Poe Jr., malamang na gagawing kapitolyo ng Pilipinas ang Pitong Gatang.

Pulisya at Krimen. Eseng ng Tondo Naging isang magaling na Pulis rin si FPJ bago sya naging NBI director. Dito natin nakita kung paano nakipaglaban si FPJ sa masasamang at mga suhulang elemento ng lipunan. Ang kanyang pakikipaglaban at patuloy na pagpapatupad ng reporma sa pulisya ay ipagpapatuloy ng kanyang kapatid na si Conrad Poe bilang bagong hepe ng PNP.

Sports. Pakners Kasama di Efren "Bata" Reyes bilang bagong kalihim ng POC, lahat ng national athletes ay kanyang patuturuang magbilyar.

Ginoong Patnugot, siguro'y di na kami nagkulang ng patunay kung bakit dapat maging pangulo si Fernando Poe Jr. Sana po ay di na maulit ang mga irresponsableng "Open Letter" na walang pakundangan ninyong inilathala dito sa inyong pahayagan. Salamat po.

Ang inyong mga linkod,

Alyansa ng Pitong Gatang (APoG)

Contact Me

If you want to be updated on this weblog Enter your email here: